E enjte, 2 Dhjetor, 2021
spot_img

Dalin raportime se rusët e shpallur “non grata” gjenden në Kosovë, reagon Policia

- Advertisment -spot_img

Policia e Kosovës ka dal me sqarim pas raportimeve se rusi i shpallur “non grata” është parë në mes të Prishtinës. Ky institucion i ka quajtur të pavërteta raportimet.

Përmes një komunikate drejtuar mediave, Policia ka thënë se dy shtetasit rus, Alexey Krivosheev dhe Denis Vengerski, janë shpallur “non grata” dhe se janë larguar nga Kosova më 23 tetor dhe që nga ajo ditë s’janë kthyer më në Kosovë.

Për personin, fotoja e të cilit është publikuar, thonë se është person tjetër (V.L.) i njohur për institucionet e sigurisë në Kosovë, si punonjës në zyrën ruse në Kosovë.

Komunikata e plotë:

Policia e Kosovës, me qëllim informimin e drejtë të opinionit publik, përmes këtij njoftimi zyrtar demanton shkrimet dhe publikimet e bëra në disa media televizive dhe të shkruara në Kosovë dhe Shqipëri, të cilat shfaqin tituj dhe video ekskluzive: “Rusi i shpallur non-grata nga Kosova shfaqet mes Prishtinës”.

Këto informacione janë të pavërteta dhe Policia sqaron se:

Dy personat Alexey Krivosheev dhe Denis Vengerskii shtetas rus, janë shpallur non-grata nga institucionet shtetërore të Kosovës me datë 22.10.2021, dhe bazuar në informacionet zyrtare të Policisë së Kosovës të evidentuara në sistemin kufitar, të njëjtit me datë 23.10.2021 (në ora 14:46 dhe 14:50), përmes pikës kufitare në Merdare kanë lëshuar territorin e Republikës së Kosovës.

Vlen të potencohet se të njëjtit, nga data 23.10.2021, nuk kanë hyrë në Republikën e Kosovës, ndërsa personi i cili është publikuar dhe shfaqur në media përmes fotografive dhe videos, është person tjetër (V.L.) i njohur për institucionet e sigurisë në Kosovë, si punonjës në zyrën ruse në Kosovë.

Policia e Kosovës do të vazhdojë angazhimin dhe përkushtimin e saj, në zbatimin e ligjeve dhe kushtetutës së Republikës së Kosovës, në interes të ruajtjes së rendit dhe sigurisë publike në vend.

/observeri/

Lexo edhe: Zëvendëskryeministrja e Kosovës raporton sot në Komisionin për Integrime Evropiane

Artikuj të ngjashëm